الخميس، 19 يناير، 2017

-
الاربعاء 18.1.2017
كان أصعب يوم مر عليّ
بدايةً من صباح ربي .. داومت لهم وأنا نفسي قافلة ومني طايقة أي أحد
حتى ابتسامتي صار تسليك بس
ومالي خلق أتكلم أو أنطق حرف واحد
حاسة بضيقة وخنقة .. الاماكن صارت خانقتني بزيادة
بعدها أتعرفنا ع بنت جديدة .. من يوم ماشفتها أبدًا ماحبيتها
معرف بس قلبي م ارتاح لها
رحنا نتغدا سوا بس أنا م قدرت أكمل
> جايتني دي الفترة غثى من أي شي أكله حتى لو لقمة صغيرة وصرت أحس بخمول بعد الاكل وفيّ نوم
وصار مالي نفس في الاكل .. م اكل إلا عشان اشحن طاقة لو شويا عشان الدراسة
قلت لصحبتي أنا بقوم أمشي ألفلف شويا وبعدين أرجع لكم
وهيا تقولي ترى أنا صايرة عارفتك مزبوط وفاهمتك إنت فيك شي !
مضايقة .. أقولها لا !
تقول إلا .. تبيني أروح معاك نتمشي ونتكلم
وأنا أقولها أطمني فعلا مافيّ شي بس دخت من الاكل وبمشي عشان أصحصح شويا
وأنا فعلا أبغا أتكلم بس مني عارفة أيش أقول ..
الكلام عالق في حلقي مني قادرة أنطق بكلمة
أبغا أكلم صحبتي إللي في السعودية بس قلتلها م حـ اكلمك الا بعد م تخلصي اختباراتك وتفضي ونتكلم برواق ع كيفنا
دي الفترة قاعدة أمر بحوسة في حياتي شويا
مليون فكرة في مخي ومليون شغلة مراكمتها
وفكرة إنه أخواني حـ يرجعوا أمريكا محزنتني
قبل اختي م تجي كنت نفس الوضع .. نفس الشعور
وكنت استناها تجي بسرعة
ع الاقل وجودها يخفف عليّ حتى لو م كنت حـ احكيها
وهذه هي رايحة تاني 😔
بعد بريك الغدا كان عندنا كلاس في اللاب
أول مادخلت من الباب التيتشر شافتني
تقولي إنت أشبك ؟!
مين مزعلك ؟ مضاربة مع أخوك ؟ ولا مضاربة مع أحد ؟
إنت بس قوليلي وأنا أشوف شغلي معاه
ضحكتني بس قلت لها أنا طيبة ومافيني شي
ولحقت صحبتي في الحمام ( الله يكرمكم ) بس عشان اسألها
ايش شايفة في ملامحي اليوم ؟!
باين عليه زعلانه ؟! أخلاقي مقفلة ؟
تقولي لا بس باين في شي شاغل بالك ومضايقك

كنا متفقين اليوم نخرج مع أصحابنا عشان يودعوا أخواني وكدا
ورحنا كوفي وقعدنا نهرج
شفتوا داكا الضيقة والخنقة المكبوته ؟!
طارت من كثر م أضحك من قلبي ع الحركات الهبلة إللي نسويها
لدرجة أتبريت من صحباتي خلاص 😩😳🙈😂😂😂
كنا والعيال قاعدين ع طاولة وحدة بس هما في جهة ونحن البنات في جهة
وكل واحد تلاقي عندو سالفة غير الثاني
بس نحن سوالفنا هبله بس تموت ضحك
طبعا كان في حد فاصل بيننا .. جانا واحد من المحل يقولنا إنتو مع بعض ؟!
قلنا له ايوا .. قال طيب ليش في فاصل بينكم ..؟!
مين يقعد بينكم ..؟! > فضول مو أكثر
بس خلصت السهرة في الكوفي رحنا كملناها في المول
قال بناكل ونحل واجباتنا عشان نرجع وننام خلاص

الحمدلله ع كل شي
الحمدلله دائما وأبدًا ❤
الله لا يحرمني من الناس الجميلين إللي كانوا موجودين وحتى الجميلين إللي ماقدروا يجوا
ويخلينا دايما مجتمعين ع خير وكل واحد شايل في قلبو للثاني حب وألفة ورحمة
حب كبير لدول الاشخاص 😘❤

*صدى

الجمعة، 13 يناير، 2017

+
في اشياء فعلا عجزت افهمها
رغم إنها واضحة زي الشمس وأي شخص ممكن يفهمها
بس أنا عقلي يقول صح تفسيرك وقلبي يقولي لا خطأ
كل الاشياء اللي قاعدة تصير معايا مو صدفة وأنا موقنه بدا الشي
بس في نفس الوقت مابغا اصدق عشان لا انصدم صدمت عمري لمن اعرف ان الحقيقه معاكسه
حاولت اخبي كل الاشياء بس في النهايه اكتشفت انه عيوني تفضحني وتوتري يفضحني وحتى تصرفاتي تفضحني
مني مستعدة اخلي اي شخص حاجز ف حياتي وحاجز لسعادتي وحريتي

*صدى

الأحد، 8 يناير، 2017

-
افهم إنك تبغاني أطمن عليك ..؟!
افهم إنك تبغى تقول إنك راجع لي تاني ..؟!
افهم إنك بتقولي لقائنا قريب أو بالأصح صدفنا الأقرب ..؟!
*صدى

الثلاثاء، 20 ديسمبر، 2016

+
عارف نفسي اتجرأ وأقولك عن مشاعري
في نفس الوقت احسها مو حلوه تجي مني
في نفس الوقت خايفة من ردة فعلك
وبالذات خايفة انجرح منك .. واذا انجرحت حـ اكرهك
ومـ حاطل في وجهك أبدًا
*صدى 
+
كيف طاوعك قلبك تروح بدون ماتشوفني أو حتى تقولي مع السلامة ..؟!
*صدى 
+
بس ابغا اقولك ..
حاسه إني مرة أشتقتلك .. وحاسة فيني بكى
خلاص بالله ارجع 😔
*صدى 
+
‎ياحظ المدينة فيك يوم جيتها
*صدى 

الأحد، 11 ديسمبر، 2016

+
بتعرف أحد ايش طينتو ؟!
اقعد وحط اذنك معاه .. واسمع السواليف اللي يهرجها .. وطريقته في الكلام
*صدى 
+
الله يجيبك لي كثر ماجاب المطر
*صدى 
+
طيب ممكن أشوفك قبل ماتروح ؟!
حـ أشتاق لك كثير 😔💔

*صدى 
+
لا تخاف عليه .. ترى أنا أكثر إنسانه مجنونه بالبرد
ودحين صرت مجنونه بالثلج كمان
طمن قلبك ..

وترى انا أخاف عليك كمان من البرد ومن أي شي

*صدى